எம்.எஸ்.பாஸ்கருடன் இணைந்து பணியாற்ற விரும்பும் இயக்குனர்லோகேஷ் கனகராஜ்

ஹரிஷ் கல்யாண்-இந்துஜா நடிப்பில் உருவாகியுள்ள ‘பார்க்கிங்’ படத்தின் செய்தியாளர் சந்திப்பு சென்னையில் நடைபெற்றது. இதில் கலந்துகொண்ட இயக்குநர் லோகேஷ் கனகராஜ் பேசுகையில்,, “இந்தப் படத்தை நான் முன்பே பார்த்து விட்டேன். பார்க்கிங் என்ற விஷயத்தை வைத்து எவ்வளவு பெரிய பிரச்சினையைப் படம் பேச இருக்கிறது என்பதைப் பார்க்கப் போகிறீர்கள். இரண்டு கதாபாத்திரங்களின் ஈகோ கிளாஷ் தான் இந்தப் படம். நடிகர் எம்.எஸ்.பாஸ்கருடன் இணைந்து பணியாற்ற வேண்டும் என்பது என் விருப்பம். அது கூடிய சீக்கிரம் நடக்கும் என நம்புகிறேன்” என தெரிவித்தார்.

அடுத்து பேசிய எம்.எஸ்.பாஸ்கர், “லோகேஷ் கனகராஜ் என்னுடன் பயணிக்க வேண்டும் என ஆசைப்படுவதாக கூறியது மகிழ்ச்சி. கமல், விஜயை இயக்கியுள்ளீர்கள். நீங்கள் கூப்பிடுங்கள் நான் வருகிறேன்” என்றார்.
முன்னதாக நடிகர் ஹரிஷ் கல்யாண் பேசுகையில், “எதிர்மறை கதாபாத்திரங்களில் நடிக்க வேண்டும் என்பது என்னுடைய ஆசை. எவ்வளவு நல்லவர்களாக இருந்தாலும் அவர்களுக்குள் ஒரு வில்லத்தனம் இருக்கும். அந்த வில்லத்தனத்துக்கு ஒரு ஹீரோயிசம் கொடுத்து தான் இந்த கதையை இயக்குநர் எழுதி இருக்கிறார். இந்த கதாபாத்திரம் எனக்கு கிடைத்ததற்கு நான் கொடுத்து வைத்திருக்க வேண்டும்.
ரஜினி, கமலின் ‘அபூர்வ ராகங்கள்’, விஜய்யின் ‘ப்ரியமுடன்’, அஜித்தின் ‘வாலி’ போன்ற படங்களை ரசிகர்கள் கொண்டாடி ஹிட் கொடுத்துள்ளனர். அது ஏன் என்றால் அந்த கதாபாத்திரங்களில் உண்மை இருந்தது. எல்லோருக்குள்ளும் ஒரு ஈகோ, வில்லத்தனம் இருக்கும். அது எப்படி, எந்த சூழலில் வெளிப்படுகிறது என்பது தான் முக்கியம். இந்த கேரக்டரை எனக்குக் கொடுத்த இயக்குநருக்கு நன்றி. சி.எஸ் நல்ல பின்னணி இசை கொடுத்துள்ளார். நல்ல கதை கொடுத்துள்ளோம் என்ற நம்பிக்கை உள்ளது” என்றார்.

இயக்குநர் ராம் பேசுகையில், , “நம் எல்லோருக்கும் எதாவது ஒரு பேஷன் இருக்கும். அதை நோக்கிதான் பயணித்துக் கொண்டிருப்போம். அதையும் நம் குடும்பத்தையும் உடைக்கும்படி ஒரு பிரச்சினை வரும்போது நிச்சயம் நாம் கோபப்படுவோம். முதல் படத்தில் முடிந்தளவு பார்வையாளர்களுடன் இணைந்து இருக்கும்படியான கதை வேண்டும் என்பதால்தான் இதை எடுத்தேன். ஹீரோவாக இந்தக் கதையில் இருக்கும் முக்கியத்துவம் இன்னொரு கதாபாத்திரத்திற்கும் இருக்கும். அதை அப்படியே ஒத்துக் கொண்ட ஹரிஷ் அண்ணாவுக்கு நன்றி. எம்.எஸ். பாஸ்கர் போன்ற லெஜெண்ட்ரி நடிகரோடு வேலை பார்த்தது பெருமை. நிறைய விஷயங்களை எங்களுக்கும் சொல்லிக் கொடுத்தார். இந்துஜா, பிரார்த்தனா, ரமா என அனைவரும் அவர்களது கதாபாத்திரத்தை சிறப்பாக நடித்துள்ளனர். பிலோமின், சாம் சி.எஸ். என இந்தப் படத்தில் அமைந்த தொழில்நுட்ப அணி எனக்கு மிகப்பெரிய பலம். குடும்பத்தோடு பாருங்கள். பார்க்கிங் என்ற விஷயத்தில் இருந்து ஈகோ எப்படி வெடிக்கிறது என்பதைப் பார்ப்பீர்கள்” என்றார்.