Kiss — திரை விமர்சனம்

காதலே பிடிக்காத நாயகனுக்குக் காதல் வந்தால் என்னாகும்? இந்த கான்செப்டில் பல படங்கள் வந்து விட்டன. இந்தப் பட நாயகனுக்கும் காதல் பிடிக்காது. ஆனால் அதற்கு வேறு காரணம் வைத்திருக்கிறார்கள்.அந்த காரணமே படத்தின் ஒட்டுமொத்த கதையையும் சுவாரசியமாக்கி விடு கிறது.

ஜோடிகள் முத்தமிடுவதை பார்த்துவிட்டால் அவர்களுக்கு எதிர்காலத்தில் என்ன நடக்கும்? என்பதை அறிந்து கொள்ளும் சக்தி கவினுக்கு இருக்கிறது.இதனால் காதல் என்ற பக்கமே கவனம் போகாமல் படு ஜாக்கிரதையாக இருக்கிறார்.

ஆனால் காதல் விடுமா? நடனப் பயிற்சிக்கு போன இடத்தில் நாயகி ப்ரீத்தி அஸ்ரானி மீது காதல் வருகிறது. அவருக்கும் இவர் மீது காதல். அதை வெளிப்படுத்த தருணம் பார்த்துக் கொண்டிருந்த நிலையில் ஒரு சந்தர்ப்பத்தில் திடீரென ஒருநாள் நாயகனுக்கு கிஸ் கொடுத்து விடுகிறார். அதனால் அவர்களின் விபரீத எதிர்காலம் கவினுக்குத் தெரிகிறது. அதனால் நாயகியை விட்டு விலகுகிறார். அவர்கள் காதல் என்னவாகிறது? மீண்டும் காதலியுடன் இணைந்தாரா என்பதை கொஞ்சம்
ட்விஸ்ட் கொடுத்து கலகலப்பு சகிதம் சொல்லி இருக்கிறார்கள் .

காதலை வெறுப்பது, காதல் வந்த பிறகு காதலியை பிரிவது, அதன் பிறகும் காதலியின் குடும்பத்துக்கு ஒன்று என்றால் துடிப்பது, மறுபடியும்
காதலியின் அன்புக்கு ஏங்குவது இப்படி ஒவ்வொரு சூழலுக்கான உணர்வுகளையும் நடிப்பில் அழகாக கொண்டு வந்து விடுகிறார் நாயகன் கவின்.

நாயகி ப்ரீத்தி அஸ்ரானிக்கு அழுத்தமான வேடம். காதலனுக்கு திடீர் முத்தம் கொடுத்த சம்பவத்தில் காதலன் தந்த விளக்கம் தன்னை கொச்சைப்படுத்துவதாக உணர்ந்து அவமானத்தில் துடித்துப் போகும் இடம் இவர் நடிப்புக்கான மகுடம்.

ஆர்ஜே.விஜய், விடிவி கணேஷ் படத்தின் காமெடி போர்ஷனை பங்கு போட்டு பிரித்துக் கொள்கிறார்கள். பல இடங்களில் சிரிக்கவும் வைக்கிறார்கள்.

நாயகனின் பெற்றோராக ராவ் ரமேஷ்-தேவயானி சிறப்பான நடிப்பில் சிந்தை கவர்கிறார்கள். சிறப்புத் தோற்றத்தில் வரும் பிரபு, கெளசல்யா தங்கள் கேரக்டர்களின் கனத்தை கதைக்குள் கொண்டு வந்து விடுகிறார்கள்.
ஹரீஷ் கண்ணணின் ஒளிப்பதிவில் காட்சிகளில் இளமைத் துள்ளல்.

ஜென் மார்ட்டின் இசையில் பாடல்களும் பின்னணி இசையும் படத்தின்
இன்னபெற தாங்கு தூண்களில் ஒன்று.

பிரபல நடன இயக்குனர் சதீஷ் கிருஷ்ணன் இந்தப்படத்தை எழுதி இயக்கியிருக்கிறார். இது மாறுபட்ட கதை என்பதை டைட்டில் போடும்போதே விஜய் சேதுபதியின் வாய்ஸ் ஓவரில் சொல்லி விடுகிறார்கள் இளமை ததும்பும் திரைக்கதை முழு படத்தையும் எனர்ஜியாக வைத்திருக்கிறது.
கிஸ் பிடிக்காமல் யார் தான் இருப்பார்கள்?